TSIEHKIE 2
5 jaepien båeries baernie sæjhta dåakterestååkedimmiem stååkedidh
Petter gie 5 jaepien båeries sæjhta iktesth dåakterestååkedimmiem stååkedidh, jïh gosse stååkedieh sæjhta skïemtjijinie årrodh. Dïhte dåakterem stillie sov pillam goerehtidh. Aalkoelisnie tjetskehkevoete jïh goerehtimmie. Mijjieh vuejnebe Petter gellien aejkien maanide gihtjie mejtie sijhtieh sov pillam njammedh, men ij guhte sïjhth. Barkijh vuejnieh Petter lea jihtseles gosse stååkede jïh ij sïjhth maam akt jeatjah stååkedidh. Petter seknies jïh måsnoeh vååjnoe. Maahta faahketji måarahtovvedh, jïh stråarkan vååjnoe gosse edtja gåatan. Akten biejjien stååkedimmesne pedagoge gåvla Petter jeahta Anton tjuara sov pillam njammedh. Anton föörhkede jïh jeahta “æsj, im sïjhth”. Ij Petter orrejh jïh jeahta “datne tjoerh dam darjodh, jis ih dam darjoeh, dellie ih åadtjoeh mov reakedsbeajjan båetedh”. Pedagoge baerniejgujmie soptseste jïh jeahta gåabpatjahkh tjoerijægan sïjhtedh ektesne stååkedidh, ij leah hijven håvhtadidh jis naakenh eah sïjhth. Seammasïenten pedagoge eajhnadåvva Petter ektine soptsestidh mænngan.
Daennie tsiehkesne Petter tjoeperdihks seksuelle dåemiedimmiem vuesehte. Daate lea mij akt jeatjah goh iemie goerehtimmie. Petter aaj seknies vååjnoe jeatjah stååkedimmesne jïh ektiedahkosne, jïh ij leah naemhtie aarebi orreme. Jis pedagoge ij lij stïeresne orreme jïh bïhkedamme, sååjhtoe Anton tuhtji Petter satnem håvhtadi maam akt darjodh maam idtji sïjhth. Dagkeres heannadimmie maahta rööpses suerkine lahtestidh, amma skaaroehtihks seksuelle dåemiedimmie. Daennie tsiehkesne lij akte vijsies pedagoge gie gåabpegh baernieh itjmieslaakan veelti, jïh dejtie viehkiehti jearsoeslaakan.
Göökte ovmessie scenerijh soptsestimmesne Petter jïh pedagogen gaskem:
Scenerije 1
Pedagoge Petterasse jeahta: “Gosse dåakterestååkedimmiem stååkedin daan biejjien, datne gihtjih mejtie Anton sijhti dov pillam njammedh. Soptsesth vielie dan bïjre”. Petter jeahta: “Sïjhtem dïhte edtja stoerre jïh garre sjïdtedh”. Pedagoge gihtjie: “Gïen pilla stoerre jïh garre sjædta?” Petter vaestede: “Dïhte Jensen filmesne”. Pedagoge daajra Jens lea Petteren stoerrevïelle jïh 3. klaassesne vaadtsa. Pedagoge jeahta satne guarkoe Petter lea tjetskehke dïsse, men ij edtjh sinsitnien pillah njammedh (ij- aalteresjiehteles dåemiedimmie). Dïhte aaj jeahta geerve almetjh eah åadtjoeh numhtie maanine darjodh.
Pedagoge toelhkeste Petter lea pornoem stoerrevïelline vuartasjamme, tellefovnesne jallh nedtefeallosne jïh tjuara maam akt darjodh olles daate idtji vielie heannedh. Dovne Petter jïh stoerrevïelle fer noere pornoem vuejnedh. Maanagïerten åejvie jïh eejhtegh ektesne soptsestieh. Barkijh tjïelkelaakan eejhtegidie jiehtieh Petter åådtje dåakterestååkedimmiem stååkedidh (seksuelle stååkedimmie), men stååkedimmien sisvege jïh dej jeatjah jarkelimmiejgujmie ektine Petteren luvnie leah tjoeperdimmiem dej luvnie vadteme. Eejhtegh leah gijhteles bïevnesen åvteste, jïh dåemiedimmiejarkelimmien bïjre govledh Petteren luvnie. Dah soptsestieh Petter dearkoes jïh prååsehkåbpoe sjïdteme, men idtjin daejrieh dïhte aaj numhtie maanagïertesne. Idtjin gan daejrieh Petter jïh Jens pornoem vuartasjin. Dah krïevije tïjjen bïjre soptsestin skïemtjes eejhteginie, jïh dah guaktah gellien aejkien tsælloejigan. Petter jïh stoerrevïelle daamtaj oktegh sjïdteme. Dah jiehtieh dej orre bïevnesi gaavhtan sijhtieh viehkiem ohtsedh jïh sijjen haestemigujmie barkedh guktie maehtieh sijjen maanah buerebelaakan gorredidh.
Scenerije 2
Pedagoge Petterasse jeahta: “Gosse dåakterestååkedimmiem stååkedin daan biejjien, datne gihtjih mejtie Anton sïjhti dov pillam njammedh. Soptsesth vielie dan bïjre”. Petter jeahta: “Manne sïjhtim ajve vuejnedh mejtie mielhkie mov pillan sistie bööti”. Pedagoge jåarhka: “Datne sïjhtih vuejnedh mejtie mielhkie dov pillan sistie bööti?”. Petter jeahta: “Iktesth mielhkie aehtjien pillan sistie båata gosse manne dam njammem”. Pedagoge gihtjie guktie daate lea Petterasse gosse dam dorje, jïh dïhte vaestede satne tuhtjie dealoes. Pedagoge jeahta ij naan maana edtjh geerve almetji pillam njammedh, jïh daate lea luhpehts. Jïh pedagoge Petterem girmie dan åvteste soptsestamme, jïh jeahta ij Petter maam akt luhpehts dorjeme. Daate lea geerve almetji dïedte. Pedagoge jeahta maehtieh vielie dan bïjre soptsestidh åvtelen veedtjemetïjjem, men dïhte tjuara voestegh dejgujmie soptsestidh mah maanah viehkiehtieh dagkerh aatigujmie.
Daesnie Petter jïjtse baakoejgujmie soptseste aehtjebe satnem daaresje. Pedagoge tjuara sov åejviem bïeljelidh, jïh vaarjelimmiedïenesjinie jallh politijinie gaskesadtedh. Ij edtjh Petteren eejhtegh bïeljelidh dan åvteste sovmehte aehtjebe lea seksuelle daaresjimmieh Petteren vööste dorjeme. Daesnie bïeljelimmiedïedtem maanavaarjelæmman åtna. Maanavaarjelimmie jïh jeatjah viehkieapparaate edtjieh laavenjostedh guktie dam gïetedidh.
Illustrasjovne: Jens A. Larsen Aas